Macedonia News

На скопскиот аеродром запленета голема количина скапи мобилни телефони

Петок, 13 Јануари 2012 17:49

Занимливости

Македонската царина утринава на скопскиот аеродром „Александар Велики“ заплени 770 мобилни телефони од марките iPHONE, HTC, Nokia, Samsung. Од нив, за околу 240 постои сомнение дека се фалсификат, односно се прекршени правата на интелектуална сопственост.

Телефоните се најдени кај двајца косовски државјани со патни исправи од Србија и според нивните искази биле набавени од Дубаи и наменети за косовскиот пазар. Телефоните биле спакувани во четири патни торби и една хартиена кеса. Пронајдени се само апратите, додека кутиите и батериите за телефоните се претпоставува дека се транспортирани на друг начин.

Вредноста на телефоните, според документите што се пронајдени, е околу 60 илјади долари, а во малопродажба нивната цена би достигнала и над 100 илјади долари.

При распитот едното лице изјавило дека е транспортер за фирма од Косово која на банкарска сметка во Дубаи префрлила 60.000 долари со кои во готово ги купил телефоните, додека другото лице изјавило дека не се негови телефоните и оти првообвинетиот го замолил на аеродромот во Виена да му направи услуга и да пренесе една кеса.

- По документираме на целиот настан ќе се поведе прекршочна постапка и доколку во неа се утврди дека е така, се изрекува глоба и мерка одземање на апаратите. Бидејќи се работи за странски државјани постапката мора да се заврши за неколку дена, а доколку се одземат телефоните со нив понатаму ќе располага Агенцијата за конфискување имот, изјави директорот на Царинската управа Ванчо Каргов.

Запленетата стока привремено е задржана.