Macedonia News

Направив доволно за членство на Македонија во НАТО

Четврток, 25 Јуни 2009 20:03

Македонија

Генералниот секретар на НАТО Јаап де Хоп Шефер денеска од Астана, Казахстан, на третиот Безбедносен форум на Евроатлантскиот партнерски совет изрази надеж дека Скопје ќе покаже поголема флексибилност за решавање на прашањето за името со Грција.

На новинарско прашање дали смета дека не направил доволно во однос на поддршката за членство на Македонија во НАТО со оглед на тоа што Македонија ги исполни сите реформи и учествува во мировните мисии Шефер, јави известувачот на МИА од Астана, дециден - направив доволно.

Тој смета дека направил се што е во негова моќ во однос на тоа прашање. Одлуката на Самитот на Алијансата во Букурешт, посочи Шефер, беше јасна дека мора да се најде решение за прашањето за името.

„Ќе ви одговорам отворено, пријателски и директно. Сакам да ја видам вашата нација во НАТО и не ги кријам моите лични амбиции. Сум бил во Скопје повеќе пати. Потребно е, искрено да видам поголема флексибилност од досега“ рече Шефер на прес-конференцијата по завршувањето на претпладневната сесија на Безбедносниот форум во Астана на кој се акредитирани околу 200 новинари.

Генералниот секретар на НАТО во заминување оцени дека инвестирал во односите со Скопје, а истото ќе го прави и неговиот наследник поранешниот дански премиер Андрес Фог Расмунсен.

На маргините на форумот, македонскиот министер за одбрана Зоран Коњановски, кој учествува на Форумот, оствари повеќе неформални средби меѓу кои со помошник-секретарот за одбрана на САД Александар Фершбоу и со заменик-генералниот секретар на НАТО Клаудио Бизоњеро. Коњановски и Фершбоу разговарале за стратешкото партнерство меѓу Македонија и САД при што биле разменети мислења како Република Македонија побргу да се приближи кон Алијансата. Фершбоу уште еднаш дал уверување дека администрацијата на претседателот Барак Обама цврсто стои зад Република Македонија и високо ја цени билатералната соработка, особено во делот со Министерството за одбрана и АРМ. Потврдено е дека САД остануваат силен партнер и поддржувач на Република Македонија.

Во текот на работниот ручек Бизоњеро побарал мислење од министерот Коњановски за состојбите во балканскиот регион. Заеднички бил заклучокот дека треба да се затвори безбедносната архитектура на Балканот што е можно поскоро со полноправно членство на Република Македонија во НАТО.

„Безбедноста низ партнерството“ е насловот на Безбедносниот форум на ЕАПС на кој низ работни групи претставници од 50 ЕАПС и НАТО-земји расправаат за стабилизирање на ситуацијата во Авганистан, улогата на соседните земји, регионалните перспективи и енергетската безбедност.

< Пред		Следно >