Macedonia News

Македонците од Австралија контра владиката Петар

Понеделник, 22 Јуни 2009 18:22

Македонија

Македонската заедница во Австралија е шокирана од потегот на австралиско – новозеландскиот митрополит Петар, кој бара од тамошните институции сите црковни имоти да станат негова сопственост.

Македонците од Мелбурн обвинуваат дека тајно, без нивно знаење, владиката Петар на 7 мај поднел барање до јавниот обвинител со кое сакал да издејствува гласање во парламентот на државата Викторија за да ги добие имотите на македонската заедница.

Ицо Најдовски вели дека согласно австралиските закони, со 9 те македонски цркви и 3 те манастири во Мелбурн, раководат непрофитни организации со извршни одбори кои пак назначуваат свештеник.

Во случајот, вели Најдовски, Петар сакал сите да ги стави под негова лична надлежност.

„Тој ќе биде владика, заменик владика и уште двајца – тројца тој ќе ги назначува и во секој момент може да продава, купува или она што се плашиме ние е да ги однесе имотите под јурисдикција или да ги соедини кон некој друга црква“ – изјави Ицо Најдовски од Македонската заедница во австралиската држава Викторија.

Најдовски прашува зошто вакви проблеми немало со македонските православни цркви во Канада и во Америка каде владееле истите закони.

За потегот на австралиско – новозеландскиот митрополит, Алфа побара мислење од МПЦ, од каде пак не упатија директно кај владиката Петар како најнадлежен за ова прашање.

Тој ги отфрла обвинувањата од македонската заедница во австралиската држава Викторија.

„Ние тоа не можеме по телефон да го елаборираме, ако сакате утре попладне“ – изјави владика Петар.

Владиката Петар најави дека утре или задутре од Битола ќе дојде во Скопје и оти ќе ни ги стави на располагање сите документи.