Macedonia News

Груевски и Црвенковски повторно во судир

Сабота, 20 Јуни 2009 18:20

Македонија

Премиерот Груевски да каже дали бара единство за решавање на спорот за името, или за негово нерешавање, побара денеска од Струмица, лидерот на СДСМ Бранко Црвенковски.

Груевски експресно одговори со обвинување дека СДСМ и другите опозициски партии од прашањето за името и идентитетот прават дневно политички поени.

„Во преговорите треба да се влезе побрзо и посуштински за да се постигне компромис, а не де се бараат разноразни изговори за преговорите да завршат неуспешно“ рече Црвенковски.

„Единство не е можно се додека прашањето што го имаме како проблем со Грција го третираат како да се однесува за наредните избори и дали ќе добијат еден поен повеќе со некоја изјава со која ќе не надмудрат или ќе не стават во неповолна позиција.

Значи, првиот чекор кон единство е политичките партии да разберат дека од ова прашање не можат да прават дневна политика, бидејќи во моментот можеби е најголемото прашање во однос на националните и државните интереси на Република Македонија“ одговори Груевски.

Тезата на Паско Кузман дека доколку не докажеме дека сме потомци на античките Македонци ќе го загубиме името, Груевски не сакаше да ја коментира, со оценка дека не е добар моментот за расправи за историски прашања.

„Ние сме Македонци јас тоа го кажав, не сме ниту антички, ниту словенски, ни не знам какви, ние сме Македонци, имаме своја држава со Устав, народ, име и нација и не би навлегувал во некои такви теми“ рече Груевски.

Груевски денеска одби да шпекулира за содржината на следната рунда преговори со посредникот Метју Нимиц во Женева, додека Црвенковски повика во преговорите треба да се влезе побрзо и посуштински за да се постигне компромис.

 

< Пред		Следно >