Macedonia News

Дејан починал од удар со нога во градите, нема кој да го препознае убиецот

Среда, 08 Септември 2010 19:35

Македонија

Обдукцијата на телото на српскиот турист Дејан Новаковиќ, кој беше убиен во Охрид, покажа дека починал од последиците на ударот со нога во градите.

Во докторскиот наод стои дека по ударот се случиле големи осцилации во работата на срцето, кое од силниот удар престанало да пумпа крв.

Целиот инцидент нејасно може да се види и на видео-материјалот во траење од шест часа кој го снимиле сигурносните камери на охридската пошта, но на него не се гледаат јасно лицата на сторителите.

Лицата не можеле да ги препознаат и тројцата очевидци, иако сите идентично го опишале настанот.

Учесниците единствено ги препозна Горан Периќ, кој во моментот на убиството бил во несвест во клубот каде започнала расправата.

Камерите на хотелот „Милениум Палас“ каде бил сместен главниот осомничен за убиството Драган Ѓорѓевиќ, покажуваат дека критичната ноќ тој го напуштил хотелот со второобвинетиот Митре Костоски кој го чекал со автомобилот.

Костоски признал дека го префрлил Ѓорѓевиќ, но рекол дека не знаел за убиството, пишуваат српските медиуми.

Дејан Новаковиќ беше убиен пред две недели во масовната тепачка која се случи во центарот на Охрид.

Истражниот судија во Охрид на осуммината осомничени им одреди мерка притвор во трење од триесет дена.

Седум од нив поради безбедносни причини се чуваат во затворот „Шутка“ во Скопје, а против Драган Ѓорѓевиќ кој е во бегство е распишана меѓународна потерница

< Пред		Следно >