Macedonia News

Ребалансот не ја загрозува работата на Антикорупциска

Сабота, 04 Септември 2010 19:54

Македонија

Скратувањето на средствата за Комисијата за антикорупција не ја загрозува работата на оваа институција, изјави премиерот Никола Груевски, повикувајќи го претседателот на Комисијата за сите проблеми да се обрати во владата на институционален начин, а не преку медиумите. Груевски исто така рече дека од Комисијата за антикорупција до сега не примил ниту една жалба.

„По ребалансот има до 50 отсто повеќе средства отколку што добиваа за време на владеењето на СДСМ. Доколку не сум во право ја повикувам Антикорупциската комисија институционално да се обрати до Владата и ќе најдеме начин да го решиме проблемот. Ние секако нема да ги оставиме без средства за работа“, рече Груевски.

Овие тврдења ги отфрли првиот човек на Комисијата за антикорупција, Илми Селами истакнувајќи дека за оваа проблематика е информирано министерството за финансии и Владата, пред и по реализирањето на ребалансот на буџетот.

“Ваквата изјава на премиерот би ја нарекол само обид од разните политички центри во земјава каде се обидуваат Комисијата да ја внесат во спорови на секојдневната политика. Фактите говорат поинаку, пред да се случи ребалансот, скратувањето на буџетот, три пати со службено писмо и за тоа имаме документација, со факти можеме да докажеме такво нешто, дека сме се обратиле до министерството за финансии, еднаш сме се обратиле на владата“, тврди Селами.

Според Груевски, средствата кои се доделуваат на Комисијата за антикорупција се двојно повеќе отколку во времето кога на власт беше СДСМ, но според Селами од тогаш до сега состојбата е променета бидејќи бил зголемен и бројот на вработени и дека сега оваа Комисија освен што го спроведувала законот за спречување корупција, го спроведува и законот за спречување на конфликт на интереси.

Од Комисијата за антикорупција побарале средба со премиерот во врска со измените на законот за антикорупција со кој се предвидува скратување на мандатот на членовите на оваа Комисија од 5 на 4 години и скратување на буџетските фондови.

Груевски рече дека средбата ќе се одржи, но не го прецизираше датумот на одржувањето на средбата.

< Пред		Следно >