Macedonia News

СДСМ бара оставка од министерката

Петок, 03 Септември 2010 18:06

Македонија

СДСМ вчера обвини дека Македонија станала каубојска држава во текот на четиригодишното владеење на Никола Груевски и дека убиствата станале секојдневие.

Токму затоа тие побараа оставка од министерката Јанкуловска Среде Скопје во период кога има врвулица од граѓани и во близина на група тинејџери како во мафијашки филм се случи ладнокрвно убиство во кое беа убиени тројца, од кои еден вработен во МВР, телохранител на министерката Гордана Јанкуловска и баџанак на шефот на обезбедувањето на премиерот. Замислете тој седел во ресторан со двајца дилери на дрога.

Еден од нив бил Јордан Јорданов со прекар ‘Ркулот член на таканаречената Франкфуртска мафија - рече Андреј Петров. Од СДСМ прашуваат што барал вработен во Шестата управа на МВР, задолжен да се грижи за безбедноста на министерката Јанкуловска, да седи со двајца дилери на дрога?

- Дали е нормално полициски функционери да ручаат со дилери на дрога? Или можеби, баџанакот на шефот на обезбедувањето на премиерот, договарал некаков бизнис со нив? Безредието и хаосот почнаа да заземаат невидени размери. Вчерашното убиство претставува потврда дека во Македонија веќе никој не е безбеден.

Повеќе од се', докажа дека во овие четири години на Груевски и ВМРО-ДПМНЕ, криминалот и власта одат рака под рака. Затоа, најмалку што може да стори министерката за внатрешни работи, Гордана Јанкуловска, е веднаш да си поднесе оставка - рече Петров.

Јанкуловска вчера рече дека безбедносната состојба во државата е стабилна и мирна и нема сознанија кои одат во насока дека постои опасност за дестабилизација или нарушување.

- Вакви инциденти се случуваат и во други држави. Важно е што полицијата навремено реагира и ургентно ги расчистува настаните. Овој настан е расчистен за помалку од 24 часа - изјави Јанкулоска. Според Јанкуловска, МВР ги презема сите мерки и активности за расчистување на случаите за да не останат отворени прашања што ќе влијаат на негативна атмосфера поврзана со безбедноста во земјата бидејќи сите индикатори говорат дека безбедносната состојба во Република Македонија долго е непроменета.