Macedonia News

Две третини од Македонците сметаат дека членството во ЕУ е позитивно

Понеделник, 30 Август 2010 18:44

Македонија

Според последната анкета на Евробарометар, за 60 отсто од Македонците членството во ЕУ е добро, за 73 е корисно, а 11 проценти сметаат дека е лошо. Неопределени се околу 27 отсто.

Бројот на оние што сметаат дека евроинтеграцијата е добра е помал за шест проценти во однос на минатата година, а на тие со спротивно мислење е зголемен за два отсто. Иако има намалување од три отсто, бројот на оние кои веруваат дека членството во ЕУ ќе и донесе корист на земјата е 73 отсто.

Во однос на економската состојба, 76% од испитаниците сметаат дека е лоша, а добра е за 23 отсто од Македонците.

Она што најмногу ги загрижува и Македонците но и граѓаните на ЕУ се невработеноста и економската ситуација. Невработеноста како најголем проблем ја посочиле 63 отсто од македонските граѓани и 46 отсто од жителите на ЕУ. Економската состојба, пак, ги загрижува 46 од Македонците од 40 отсто од граѓаните на ЕУ.

Ист процент 24 и од граѓаните на Македонија и од жителите на ЕУ се надеваат на подобрување во наредните 12 месеци, по 35 сметаат дека ситуацијата ќе остане иста, а по 36 отсто очекуваат влошување.

Околу 75 отсто и од Македонците и од жителите на ЕУ сметаат дека се неопходни дополнителни реформски мерки за надминување на кризата. Над половина од македонскиет граѓани (56 отсто) се подготвени одреден период да живеат полошо доколку тоа донесе повисок стандард за следните генерации. Тој процент во ЕУ изнесува 46.

Истражувањето што деновиве го објави Европската комисија е спроведено од 5-ти до 28-ми мај годинава во 27-те членки на ЕУ, во земјите-кандидати за членство Хрватска, Македонија Турција и Исланд, како и во турскиот дел на Кипар. Со анкетата во Македонија биле опфатени 1.048 лица

< Пред		Следно >