Macedonia News

Прилеп ја одбележува 9- годишнината од загинувањето на резервистите кај месноста Карпалак

Сабота, 07 Август 2010 07:18

Македонија

Со положување цвеќе пред споменикот во кругот на касарната „Мирче Ацев“ во Прилеп најблиските, делегации од општината и од здруженијата „Карпалак“ и „Воените обрзници-резервисти, од настаните во 2001“ утре го почнуваат одбележувањето на деветгодишнината од загинувањето на 10 - те резервисти кај месноста Карпалак.

Делегациите ќе ја посетат и спомен собата во касарната каде се фотографиите и спомените на загинатите бранители. Утре попладне цвеќиња ќе бидат положени и пред споменикот во селото Лениште, а ќе биде посетен манастирот „Света Петка“.

Централното чествување е в недела на пладне пред спомен-обележјето Карпалак во центарот на Прилеп. Градот ќе им оддаде почит, а најавени се  и претставници од Министерството за одбрана и од Генералштабот на АРМ.

По повод 9-годишнината од масакрот кај Карпалак, пригодно ќе биде означен и почетокот на градежните работи за уредување на  просторот околу спомен обележјето во центарот на градот каде ќе има симболичен спомен комплекс за сеќавање на бранителите.

На 8 август 2001 година кај Карпалак животот го загубија резервистите Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски.
В недела во 10 часот во црквата „Свето Благовештение“ ќе се одржи панихида за покој на нивните души. Делегации ќе го посетат и кобното место, на Карпалак на патот Скопје – Тетово кога конвојот прилепски резервисти на 8 август 2001 година беше нападнат при што загинаа 10-те бранители.

< Пред		Следно >