Macedonia News

СДСМ побара да се утврди улогата на Коњановски во случајот РЕК Битола

Среда, 04 Август 2010 21:10

Македонија

СДСМ во средата побара да се реши случајот со 12 директори од РЕК Битола  против кои беа поднесени кривични пријави за криминал и корупција, односно тие да бидат суспендирани од работните места и побара да се испита одговорноста на тогашниот директор Зоран Коњановски.

Од ВМРО-ДПМНЕ пак велат дека за секој за кој ќе се најдат докази или ќе постои основано сомнение дека е корумпиран или се занимава со криминал и премиерот Никола Груевски и партијата остро ќе реагираат и ќе го осудат таквиот чин.

„Дека станува за огромен и тоа смислен и организиран криминал говори и фактот дека обвинението ги товари 12-те директори дека во текот на целата 2008-ма година континуирано правеле крупни криминални и корупциски дејствија потпишувајќи нереални фактури со што ја оштетиле РЕК Битола за околу 8,6 милиони евра. Кривични пријави за своето работење во 2008 година добија сите први луѓе на РЕК Битола освен тогашниот генерален директор Коњановски“, рече Атанаско Туневски од СДСМ.

Тој праша како е можно сите клучни директори во РЕК Битола да се обвинат за континуирано криминално работење, а не и генералниот директор, и зошто директорите на ЕЛЕМ и РЕК Битола, Чингоски и Коњановски дозволиле континуиран криминал и корупција.

„Дали оваа огромна криминално-корупциска афера е само мал дел од уште поголемиот криминал кој се прави во ЕЛЕМ и РЕК Битола со очигледна подршка на Груевски и Владата? Затоа, се додека не се расчисти овој огромен корупциски скандал најмалку што треба АД ЕЛЕМ да направи е да ги суспендира и отстрани обвинетите од нивните работни места. И секако, во целиот овој криминал мора веднаш да се истражи на објективен и неселективен начин улогата на Зоран Коњановски“, рече Туневски.

Според ВМРО-ДПМНЕ, опозициската СДСМ со ваквата прес-конференција се обидува да дискредитира и манипулира со јавноста и оти се ставаат пред институциите на судската власт.

„Ние сме  принципиелни и кога  во прашање е борбата против криминалот и корупцијата, докажано е дека сме крајно безмилосни. И тоа е принципот од кој ние немаме намера по ниту една цена да отстапиме. СДСМ уште еднаш се става во улога на суд и егзекутор, што произлегува од нивното минато и нивните демократските капацитети“, реагираат од ВМРО-ДПМНЕ

< Пред		Следно >