Macedonia News

Нема кој да врши технички преглед на бродовите

Петок, 16 Јули 2010 19:33

Македонија

Бродовите кои пловат по Охридското езеро во моментов се технички непроверени, тврдат дел од експертите.

Два месеци по раскинувањето на договорот со германската компанија Лојд, летово нема кој да врши технички преглед на бродовите. Иако министерството за транспорт и врски завчера потпиша договор со француската компанија Биро Веритас за да ја врши таа дејност, сепак факт е дека охридските бродови ќе останат технички неосигурани во текот на главната туристичка сезона.

"Кој сега во овој момент ќе ја сноси одговорноста доколку повторно се случи некој немил настан? Зошто дозволува Охридската капетанија да пловат со комерцијални цели пловни објекти кои не ги задоволуваат условите според законот за безбедна водна пловидба?

Сега имате случај каде туристи се пренесуваат на долги дестинации со нерегистрирани односно технички непрегледани, а можеби и неисправни пловни објекти што е сериозна работа"- Томислав Тунтев-професор по сообраќај на Универзитетот во Битола

Од Здружението на бродари уверуваат дека пловилата кои ги користат се технички исправни и оти нема место за загриженост.

„Според меѓународните правила еден брод може да биде регистриран три месеци пред официјалниот истек и три месеци после официјалниот истек. Бродовите се технички исправни и важи тој дел од практиката кој вели дека после денот на регистрација бродот уште три месеци може да плови, а потоа да се изврши технички преглед“- Горан Устинијановски-претседател на здружение на бродари.

И од Охридската капетанија тврдат дека сè е под контрола. Од Министерството за транспорт и врски информираат дека за неколку дена претставници на француската компанија Биро Веритас ќе дојдат во Охрид за да започнат со детална техничка проверка на бродовите. Потоа ќе се знае кој од нив ќе добие дозвола за пловење, а кој не.

< Пред		Следно >