Macedonia News

Подолго време постоеја препирањата во врска со тоа дали децата од малцинствата во државава треба задолжително да го изучуваат македонскиот јазик, покрај нивниот мајчин, уште од прво одделение.  Меѓународните претставници предупредуваа дека одлуките, кои ги засегаат меѓуетничките односи во земјата треба да се носат внимателно, врз база на претходна јавна расправа и поширок општествен консензус.

Особено остри беа Албанците во државава кои на неколку пати протестираа во врска со ова прашање, а првооделенчињата ја бојкотираа наставата.  Експертите уште тогаш предупредуваа дека решението е незаконско, а иницијативата за укинување на решението на министерот Никола Тодоров, кое стапи на сила во јануари годинава, пред Уставниот суд ја поднесоа ДПА и невладината организација „Реалитети“.  Сега нивната тенденција се оствари со тоа што Уставниот суд на Република Македонија донесе одлука за укинување на решението на Министерството за образование.

Објаснувањето на Уставниот суд е дека оваа сфера била уредена со законски, а не со подзаконски акти.  Според Уставниот суд, со законот за основно образование предвидено е немнозинските заедници, македонскиот јазик да го изучуваат од четврто одделение.  Уставните судии оценуваат дека со донесувањето на решението, министерот за образование излегол од законските овластувања и се вмешал во законодавната власт.

Тодоров експресно реагираше и на брифинг со новинарите ги искара уставните судии дека немале право да го укинуваат решението, кое како што рече, за волја на вистината, во пракса не се ни спроведува.  Тодоров порача дека во случајов зборува како правник, а не како министер, при што на брифингот преферираше да разговара само со новинарите кои го познавале правото затоа што според него само тие можеле да разберат дека неговото решение не било противуставно. 

Министерот за образование смета дека уставните судии направиле грешка бидејќи тој решението го донел како орган на управа и не се вмешал во законодавната власт.  Тодоров смета дека носењето на решение од овој тип му го дозволува законот за управна постапка бидејќи се работи за група на граѓани, а не за целата држава.

„Не планирам да отстапам од одлуката, планирам да ги убедувам оние кои што треба да ја применуваат дека примената на оваа одлука е од полза на сите нас кои живееме во Р.Македонија“ - изјави Тодоров.