Macedonia News

Прашањето за името се очекува да се реши за неколку недели

Сабота, 26 Јуни 2010 06:36

Македонија

Според белгиското претседателство на Европската унија, прашањето за името меѓу Македонија и Грција може да се движи кон решение и дека тоа може да се постигне во текот на неколку недели.

Вршителот на должноста министер за надворешни работи на Белгија, Стивен Ванацкере, изјави  дека тековните разговори меѓу Грција и Македонија може да имаат позитивен резултат кон ова прашање кое го попречува отворањето на преговорите за членство во ЕУ.

"Вчера повторно имав контакти со моите колеги на ниво на надворешни работи. Верувам дека сите се свесни дека дискрецијата во врска со разговорите кои се одвиваат деновиве меѓу претставниците на Грција и поранешната југословенска Република Македонија, можат да водат кон решение, но треба да ја зачуваме доверливоста, бидејќи многу добро знаеме дека станува збор за нешто што треба да се постигне за неколкуте недели кои се пред нас. Затоа не сакам да давам изјави кои можат да му наштетат на овој процес, но верувам дека треба да се најде некое решение“, рече Ванацкере.
 
По претставувањето на програмата на следното белгиско претседателство во Брисел, вршителот на должноста белгиски премиер, Ив Летерм, истакна дека освен прашањето за името, земјата треба да ги исполни и критериумите од Копенхаген.

"Што се однесува до ставот на Белгија, од една страна ние сме свесни дека треба да се искористи можноста и историската шанса во Европската Унија да се интегрираат балканските земји, меѓу другото и вашата земја.

Но, од друга страна, да судиме врз основа на досиејата да видиме дали се исполнети критериумите од Копенхаген и дали се исполнети сите услови за почеток на преговорите. Јасно е дека до денеска сè уште постои спор со Грција, меѓу другото и овие спорови треба да се решат. Освен овој проблем има и други прашања кои треба да бидат третирани“, истакна Летерм.

Ако решението се најде пред Советот на министри што ќе се одржи во јули под водство на белгиското претседателство, Македонија може да очекува добри вести. Исто така во јули, Белгија ќе го организира состанокот на Советот за стабилизација и асоцијација со Македонија, состанок на највисоко ниво во односите меѓу земјата и Унијата. Во врска со проширувањето, белгиското претседателство вети поддршка за приближување на сите земји кои ќе ги исполнат сите потребни критериуми.

 

< Пред		Следно >