Macedonia News

Од голем интерес за митингот, снема автобуси и комбиња низ Македонија

Петок, 25 Јуни 2010 21:29

Македонија

Митингот на СДСМ в недела, рекоа денеска од оваа партија, нема да биде за името, туку против политиките на Груевски.

Два дена пред одржувањето, од СДСМ соопштија дека со собирот ќе го означале стартот на барањето за предвремени избори по ноември. Тврдат дека заинтересираноста на граѓаните била толку голема што, иако ги изнајмиле сите расположливи 500 автобуси и 150 комбиња во земјава, сè уште немале доволно за сите заинтересирани. Однапред купиле и билети за патарина.

“Се обидувавме и ги разгледувавме можностите да изнајмиме автобуси од нашите соседни земји Бугарија и Србија, но поради одредени регулативи за одвивање на внатрешниот сообраќај во Република Македонија тоа не можевме да го направиме”, вели Емилијан Станковиќ- портпарол на СДСМ.

Токму во желбата да се покаже дека може да се соберат повеќе луѓе отколку што тоа го стори ВМРО-ДПМНЕ неодамна, поранешниот член на СДСМ, Есад Рахиќ, ја гледа една од причините за митингот. За разлика од него кој смета дека сега не е време за митинг, професорот Назми Малиќи на најавата за собирот гледа позитивно.

“Сега не ни се потребни митинзи затоа што секој митинг чини над 100 илјади евра. Во една држава каде што пациенти умираат затоа што немаат апарати за дијализа, нема средства за дезинфекција, замислете тие две политички партии место парите што ги даваат за митингаштво да ги донираат во здравството во СОС детски села итн, верувајте дека и луѓето ќе почнат повеќе да им веруваат”, смета Есад Рахиќ- поранешен член на СДСМ.

“Ова што го најавуваат социјалдемократите сметам дека е една новина на сцената во овие две години затоа што постоеше неразбирливо молчење на опозицијата и видливото појавување пред масата со поубедлив проект ќе создаде контрола врз позицијата и ќе создаде позитивен ефект за урамнотежување на односите во создавањето на политиката во Република Македонија“, рече Назми Малиќи, професор ФОН.

Инаку, како што најавија социјалдемократите, на собирот од пред Владата ќе порачале дека се против економско осиромашување, газење на демократијата, загрозување на човековите права, немање слобода на медиумите и на невладиниот сектор. Сите овие негативности, тврдат тие, се присутни во нашето општество, а ги создавала актуелната влада.

 

< Пред		Следно >