Macedonia News

Времето не работи за Македонија

Среда, 23 Јуни 2010 18:57

Македонија

Известувачот за Македонија во Европскиот Парламент не е изненаден од невклучувањето на земјава во заклучоците на Советот во Луксембург, нешто што, според Зоран Талер, било очекувано за оние кои ги следат настаните во Македонија.

Во интервју за macedonia-news.info по јасната препорака на комесарот Филе, на високата претставничка Ештон и по повторувањето на истото од страна на генералниот секретар на НАТО, Расмусен дека решавање на проблемот со името е главна пречка за евроинтеграцискиот пат на Македонија, Зоран Талер, го наведува истото.
„Факт е дека решавање на проблемот со името сега е условот „ sine qua non“, кога говориме политички. Затоа, мое лично мислење е дека неплодните разговори кои само даваат слика дека се преговара, за Македонија не функционираат. Ниту времето не работи за Македонија. Јас не велам дека ако не се најде компромис треба да се прекинат разговорите. Но, оваа тактика на покажување конструктивност без конкретен резултат за проблемот, не дава никаков позитивен политички резултат во Македонија. Верувам дека повеќе од било кога е потребно да се најде едно основно решение, на национално ниво и меѓу главните политички партии во Македонија, за тоа што е прифатливо и истото да се каже јавно. Потоа да се обидат да најдат нешто во рамките на тој компромис.“

Во врска со предлозите или можностите за решавање на проблемот околу името, Талер вели дека додека Грција на секои два месеца излегувала со некој можен предлог во медиумите, од Македонија ниту од самите поддржувачи на земјата во ЕУ или на друго место, не знаат што би било прифатливо, а што не. Во меѓувреме, замрзнатата ситуација без конкретни резултати, според Талер, сериозно ја загрозува ситуацијата во Македонија, во регионот, но и во ЕУ.

„Нема потреба да бидеме ’Ајнштајни’ или да бидеме многу интелигентни за да видиме дека само во последните месеци ситуацијата, како психички, така и политички се влоши. Немањето прогрес кон ЕУ ги ослабува умерените политички сили, особено кај Албанците, но и кај Македонците и најрадикалните елементи се оние кои добиваат поголема политичка моќ. И секако дека можеме да предвидиме дека за само неколку месеци тоа може да ја смени ситуацијата и на теренот. Самата коалиција е под знак прашалник, а има и многу други проблеми. Само можеме да се надеваме дека нема да има инциденти на теренот.“

Ветувајќи дека ќе продолжи да работи и да ја поддржува Македонија во нејзините интеграциски напори, Талер смета дека кога на земјите од регионот не им се даваат јасни цели, како што беше визната либерализација или како што може да биде членството, тогаш позитивните агенди на Балканот се заменуваат со опасни и негативни алтернативи.

 

macedonia-news.info

< Пред		Следно >