Macedonia News

Георгиевски економските адути ги чува за избори

Четврток, 17 Јуни 2010 22:41

Македонија

Со три мерки може да се направи целосен пресврт во економијата, но нема да ги кажеме сега, туку на избори, во четврток на прославата на одбележувањето на 20-годишнината од возобновувањето на идејата на ВМРО, го изјави почесниот претседател на ВМРО-Народна партија Љубчо Георгиевски

Во своето обраќање на свеченоста, на која присуствуваа приврзаници на партијата, како и поранешни пратеници од редовите на ВМРО-ДПМНЕ, Георгиевски остро реагираше на неодамнешните изјави од поранешните негови сопартијци, дека него го немало на списокот основачи на ВМРО-ДПМНЕ.

„Не разбирам зошто е таа постојана потреба од бришење на вистината и историјата? Мислев дека тоа е карактеристика на комунистичките режими“, рече Георгиевски, при тоа додавајќи дека никој нема право да го брише неговото име од историјата на партијата.

Тој ја запраша партијата на власт зошто и биле потребни 50 дена да го слави роденденот и да приредува карневал низ скопските улици.

Почесниот претседател на ВМРО-НП се наврати на деновите пред 20 години кога е основано ВМРО-ДПМНЕ, нагласувајќи дека многумина се декларирале за основачи на партијата, но дека подоцна, се откажувале од партијата.

„Кој имаше храброст во таа далечна 1990. година да излезе и да извика сакаме македонска војска, македонски пасоши, пари...Кој се потпишуваше на документите, кој излегуваше на трибини, дебати, во весниците, да ги објаснува позициите зошто го бараме тоа“, запраша Георгиевски.

Тој се наврати и на периодот на неговото владеење, истакнувајќи дека тоа била влада со најдобри резултати на повеќе полиња.

< Пред		Следно >