Macedonia News

Ништо ново од средбата Груевски-Папандреу

Четврток, 17 Јуни 2010 22:16

Македонија

Ништо ново oд петтата очи в очи средба на премиерите на Македонија и Грција.

Уште еднаш, според официјалното владино соопштение, изразиле поддршка за преговорите под покровителство на Метју Нимиц и подготвеност „за наоѓање заемно прифатливо решение коешто нема да нанесе штета на ниту една од двете страни“. Други детали од македонска страна нема. Но, заменик-шефот на грчката дипломатиј,а Димитрис Друцас, со директна порака до официјално Скопје: Датум за преговори нема, сè додека не се реши спорот со името.

„Мојата порака до луѓето во вашата земја е дека Грција е подготвена и има волја за решение, а мојот повик е дозволете ни да седнеме на маса на конструктивен начин под покровителство на ОН и да најдеме решение за спорот со името.

Штом тоа решение е најдено, тогаш веднаш можеме да почнеме со преговорите за во ЕУ. И дозволете ми да повторам нешто што сум го кажал и во минатото. Тоа е дека штом вашата земја може да ги почне преговорите ќе најдете во Грција најискрен, најзначаен  и највреден партнер“, истакна Друцас.
Прашан дали средбата Груевски – Папандреу донесе некој напредок, Друцас рече дека „премиерите не преговараат, бидејќи процесот се води под закрила на ООН“ и оти целта на овие средби е да се даде импулс на севкупните односи. Пораката од Грција, вели тој, е дека таа „е подготвена и ние чекаме и лидерството во Скопје да дојде со истиот конструктивен пристап и да седнеме на преговарачка маса во ООН“.

 

Друцас не сакаше да ги коментира последните шпекулации за наводно нов предлог „Република вардарска Македонија“, но потенцираше дека Атина е подготвена да разговара за секој предлог кој го исполнува клучниот услов – име со географска одредница за сите.

 

Одговор на ваквите пораки од Грција, од македонска страна засега нема. А, исходот за Македонија и од овој европски самит, на чии маргини беше и средбата Груевски – Папандреу, е статус кво. Пораката од Брисел е идентична со грчката – за напредок е потребно решение во спорот околу името.

< Пред		Следно >