НАТО и ЕУ остануваат нашата иднина која е без алтернатива, изјави денеска претседателот Ѓорѓе Иванов по завршетокот на Минхенската безбедносна конференција. 

- Иако во овој процес сме попречени од една политика на апсурди и политика наметната со сила, правиме се и наоѓаме начин како да ги одблокираме тие процеси, истакна Иванов.

Тој информира дека во тој контекст биле и средбите што ги оствари на маргините на конференцијата, јави известувачот на МИА.

Со претставниците на американската администрација е разговарано за македонскиот придонес во НАТО и помошта што ја добиваме од Северноатлантската алијанса, а отворени се и прашањата кои се поврзани со интегрирањето на Македонија во Алијансата.

Иванов рече дека е разговарано и за процесот кој се води во рамките на ОН и за потребата од негово динамизирање. Во тој контекст е и средбата со Метју Нимиц која треба да се одржи кон крајот на овој месец.

На средбата со британскиот министер за одбрана Боб Еинсворт, меѓу другото, е разговарано са соработката што Македонија и Велика Британија ја имаат во евроинтеграциите, како и за британската помош за македонската армија.

Во разговорот со вицепремиерот на Руската Федерација Сергеј Иванов отворени се прашања за економската соработка меѓу двете земји при што е констатирано дека таа добива на интензитет.