Повеќе gраѓани денеска на плоштадот Македонија во Скопје го изразија своето незадоволство од проектот на Владата и Општина Центар - „Скопје 2014“

„Денешниот протест има цел да покаже колку сме против намерата на Владата и на градоначалникот на Општина Центар да го уништат скопскиот плоштад и да го уништат централното скопско јадро“, рече Никола Наумовски од Плоштад слобода.

Организаторите беа задоволни од бројот на поддржувачи.
„Гледаме дека тие само го имаат заградено плоштадот и сме сигурни дека тие немаат пари и сакаме да ги поштедиме скопјаните од тоа да имаат градилиште на плоштадот“, рече Наумовски.

Од Плоштад слобода велат дека во период кога во Македонија има 300 илјади невработени, деца кои учат во никакви услови, не е логично да се зборува за инвестиција од стотина милиони евра за изградба на центарот на Скопје.

„Има многу поважни работи кои треба да се средат и ако сакаме да го зачуваме заедништвото не треба да промовираме проекти кои што предизвикуваат верска и етничка нетрпливост бидејќи визијата за Скопје 2014, не само што е мачоистичка и ги вклучува само мажите бидејќи во ниедна од скулптурите не е претставена жена, албанец, турчин или кој било друг претставник на каква било општествена група во нашето општество“, рече Ивана Драгшиќ од Плоштад слобода.
За нив, визијата за Скопје 2014 е неприфатлива и најавија дека  ќе се борат против неа.

За Плоштад Слобода, кој е и организатор на собирот, не е прифатливо да не се објават табли на кои пишува кој е инвеститорот на градбата, бројот на дозволата итн.

„Ние од полицијата од четвртокот наваму го бараме тоа и сеуште не сме го добиле, и уште не знаеме кој го узурпира јавниот простор- плоштадот“, вели Драгшиќ.

„Жалам што Владата се уште не разбрала дека 2014 ќе се случи по 2012, и мислам дека ова сценарио на владата наликува на филмот 2012 и сака да го уништи Скопје, и сака да ги уништи меѓуетничките односи меѓу двете најголеми заедници како и меѓуверските односи. Ако владата размисли подобро тогаш ќе го избегне сценариото од 2012“, рече Артан Груби од граѓанското движење Разбуди се.

Плоштад Слобода најави организирање на други настани поврзани со нивното незадоволство, издавање разни публикации, видеа и други видови соработки со други иницијативи во градот.

На протестот присуствуваа млади луѓе, претставници на албанското малцинство во Македонија, поддржувачи на проектот за изградба на Бурмали џамија, Разбуди се, членовите и поддржувачите на НВО Плоштад Слобода, јавни личности, политичари и интелектуалци кои не се согласуваат со започнатиот проект за новиот изглед на Скопје.