Ќе продолжат активностите за поставување на камен насип во Пештани, на патниот правец кон Албанија, а истовремено ќе се продолжи и со формирање на насипи од вреќи со песок и земја во делот на крајбрежниот појас на Охридското езеро кај Калишта и Радожда, како превенција од ерозија на земјиштето поради зголемениот водостој, одлучи денеска Координативното тело на Владата за справување со последиците од поплавите на состанокот на кој претставниците од тимовите реферираа за состојбата на теренот.

На состанокот било заклучено Министерството за транспорт и врски да се координира со локалната самоуправа, околу евентуална превенција на дел од колекторскиот систем во Охрид.

“На состанокот на Координативното тело беше констатирано будно да се следи состојбата на патниот правец Маврово – Дебар. Во таа насока а поради можноста од одрони и лизгање на замјиштето, апелираме дека е потребна претпазливост од сите кои се движат по овој патен правец,” рече портпаролот на министерството за одбрана, Сашко Димов.

Во подрачјето на Тетово и Гостивар и понатаму се санираат речните корита, каде поради смет беше оневозможем нормален проток на водите. Во овој реон се завршени активностите за поставување на насипи од вреќи со песок во селото Мало Турчане. Во ова село е саниран и патот до каналот, додаде Димов.

Како што информираат од министерството за одбрана во текот на вчерашниот и денешниот ден до 12 часот на локациите каде што се одвиваат превентивните активности биле поставени насипи со вреќи од песок, за што се поставени повеќе од 13 илјади вреќи, а во изминативе два дена се ангажирани повеќе од 300 лица, кои активно се вклучени во превентивните мерки и активности.

Во текот на денешниот ден тимовите од Координативното тело се повторно на терен. Според дефинираната агенда тимот предводен од министерот Коњановски е во дебарско, тимот предводен од министерот Димовски е во Охрид и Струга, тимот предводен од заменик министер за транспорт и врски е во полошко, тимот предводен од директорот на ДЗС е на патниот правец Дебар Струга кај Луково и тим предводен од директорот на Управата за водостопанство Методија Томоски е во реонот на Пелагонија, информираат од министерството за одбрана.